تذكرون يوم كنتو صغار ؟!!!!!

(معني الطفولة )
تذكرون.. يوم إيّيك واحد ماصخ من العايلة أكبر منك ويقول لك: تبا أرسم لك ساعة وانته تمد له إيدك ويعضّك هذيك العضة اللي تصارخ منها .

تذكرون.. أول يوم دوام بالمدرسة كانوا يسلمونا الكتب كلهم مع بعض وصافينهم من الكبير إلى الصغير وطبعاً الكبير كتاب العلوم وكانوا يربطونهم بحبل عشان ما يطيحون

تذكرون.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت كاكاو ونتم ناكل مثله ويا البسكوت المالح.



‏تذكرون.. يوم كنا نربط الشرشف على رقابنا مثل سوبرمان ونصعد فوق الكبت وانط على الدواشق وآخر شي ناقز غلط ومنكسرة إيدك.


‏تذكرون.. يوم كنا نحط بالفريزر العصير الطويل بونصين أو لبن أب عشان يثلج وكل ما تسير تبغي تاخذه تلقى الوالدة منزلتنه تحت وما ثلّج.. يا حسرة راحت الفرحة.


تذكرون.. يوم كانوا الأولاد يغسلون الحوش بالبروش والصابون قمة الوناسة.. يمسك البروش أونّه بيساعد وآخر شي طايح له سكيتنج على الكاشي والزولية وفي الليل وارمة ريله.



تذكرون.. يوم كنا نستقبل الحجاج من زود الفرحة واللهفة على الصوغة وآخر شي كم: مسواك وقحفيتين والكاميرا الحمراء وسجادة وللبنات قطعة خام مال الهنود وساعة.


تذكرون.. يوم كنا نشوف مسرحيات الأطفال مثل السندباد والزرزور وألف باء تاء اللي فيها عبدالرحمن العقل ويوم الحرامي يكون وراه.. نصرخ من قمة راسنا: ورااااااك وراااااااك وهو يقول وينه وينه يميييييين يميييييين....
ياعيني على الاستهبال .



تذكرون.. أيام الدراسة قبل يعني يكون بنشد حيلنا بالدراسة ونشتري قلم فسفوري أصفر وإلاّ برتقالي عشان نظلل على الشي المهم وآخر شي مظللين على كل الكتاب.. وين الشي المهم؟؟ ما أدري!!!!



تذكرون.. أول ما يسرقون الأولاد سيارة أبوهم كانت الريل اليمين على البترول والريل اليسار على البريك من الثوارة .... ‏ولازم طبعاً يمر على الربع يصيّح ويلات عليهم....‏ويعطيه بريك وبترول



تذكرون.. يوم كانت جائزة البيبسي سيارة في غطاة الغرشة كنا الظهر نسير وراء الدكان ونبطل الغراش كلها وبعدين نرد نسكرهم أي كلام تشوف الغازات كلها طايرة ومتبخرة ومستوي البيبسي ماي .



‏تذكرون.. يوم يقول الأستاذ أو المعلمة ان هذي الصفحات ملغية
تعال شوف الشخابيط اللي على الصفحة من فوق لين تحت وإلاّ نطرها من الكتاب.....‏ليش هالحقد عاد؟



تذكرون.. يوم نتضارب مع ولد الجيران وتقول له: خوز عن بيتنا وعن رصيفنا..
يقول لك: مب رصيفكم هذا رصيف الحكومة



تذكرون.. يوم يسيرون الأولاد السوق ويّا أبوهم يشتري لهم قطع كنادير للعيد ..وآخر شي شاري طاقة كاملة نفس اللون وتشوفهم بأول يوم العيد من الوالد لين الأخو الصغير نفس لون لابسينه كلهم ‏تقول فرقة عيالة.


تذكرون.. يوم يبغون الشباب يشلون حديد قبل يترسون قواطي النيدو اسمنت ويحطون بينهم بيب حديد وهووووووووب وآخر شي منكسرة ظهورهم.



تذكرون...يوم نكسف الدواشق ونسويهم خيم...أو ناخذ التكي ونسويهم بيوت.